Pasi u kualifikuam në fazën finale të Euro 2016, tanët filluan të flisnin me zë të ulët për një kualifikim të mundshëm edhe nga faza e grupeve, ndërsa tani zërat janë shtuar ndjeshëm. Dhe është vetë skema e vendosur nga organizatorët që në një farë mënyre na e favorizon edhe këtë ide të jashtëzakonshme. Në fazën e 1/16 do të shkojnë edhe vendet e treta të katër prej gjashtë grupeve, gjë që të bën të shpresosh për të vazhduar edhe duke pasur pak pikë të grumbulluara. Ndërkohë, sipas llogarive tona (kemi filluar ta cilësojmë veten edhe si mjeshtra të lapsit), Rumania është skuadra që duhet të renditet pas nesh, pasi me Francën dhe Zvicrën nuk na del hesapi edhe në ditët kur optimizmin e kemi në menynë e çdo vakti. Por mjafton të rishohësh edhe një herë me vëmendje miqësoren midis Rumanisë dhe Spanjës, për të kuptuar se pikërisht ne na nevojitet një skuadër për ditët që do të qëndrojmë në Francë, të cilën nuk e kemi. Skuadra e Jordaneskut i kishte llogaritur shumë mirë forcat e saj dhe i kundërshtuan tri herë kampionët e Europës me një mbrojtje të vendosur mjaft mirë, si dhe duke tentuar t’i kapnin nëpërmjet kundërsulmit, që edhe mund t’ia arrinin. Një 0-0 ndaj iberikëve është një rezultat shumë sinjifikativ. Gjatë të gjithë 90 minutëshit nuk i lanë pothuajse asnjë mundësi spanjolëve për të rezikuar portën e Tatarushanut dhe kjo nuk është pak, pasi kishin përballë një makinë golash. Pra Rumania i njihte mjaft mirë limitet dhe si e tillë është natyrale në pretendime… të na lërë prapa pikërisht ne kalemxhinjtë.
