Kompania kineze “China State Contruction” ka tërhequr ofertën për ndërtimin Rrugës së Arbrit. Lajmi konfirmohet për Report TV nga drejtori i Autoritetit Rrugor Shqiptar Dashamir Xhika.
Ai thotë se kompania kineze ka paraqitur pranë Ministrisë së Transporteve një kërkesë zyrtare për tërheqjen nga oferta.Kompania kineze kishte parashikuar një kosto prej 300 milionë dollarë për ndërtimin e një segmenti prej 27 kilometra të kësaj rruge.
Oferta parashikonte që nëse kostot nuk do mbuloheshin nga taksa e kalimit që do paguhej nga drejtuesit e mjeteve, të mbulohej nga buxheti i shtetit. Por ndërsa pritej që punimet për ndërtimin e kësaj rruge të nisnin pranverën e vitit 2017, tërheqja e kinezëve vë në pikëpyetje respektimin e këtij afati.
Xhika pohon se aktualisht një kompani shqiptare ka shprehur interes për ndërtimin e kësaj rruge, dhe se ka depozituar në Ministrinë e Transportit një propozim të pakërkuar për këtë qëllim. Bëhet fjalë për kompaninë “Gjoka Konstruksion”, e cila aktualisht është e përfshirë në projektin e ndërtimit të dy loteve të Rrugës së Arbërit, në dalje të Urës së Vashës.
Mësohet se oferta e pakërkuar e kompanisë Gjoka Konstruksion parashikon ndërtimin e gjithë pjesës së mbetur të Rrugës së Arbërit për 190 milionë dollarë. Gjoka Konstruksion sh.a është themeluar në vitin 1994 nga Rrok Gjoka, administrator dhe aksioner i vetëm i kompanisë. Aktiviteti i saj ka filluar në 1994 me seli në qytetin e Pukës për t’u zhvendosur në vitin 1998 në Tiranë.
/shqiptarja.com/
