Deputeti demokrat, Ervin Salianji ka reaguar pas prezantimit të Paketës së Rezistencës nga qeveria dhe vendimit për të rritur çmimin e energjisë për çdo familjar që konsumon më shumë së 800 kWh energji elektrike.
Salianji shkruan në Facebook se qeveria po ua ngarkon barrën e çmimit familjarëve, në një kohë që sipas ERE, pjesa dërrmuese e energjisë elektrike është prodhuar në vend. Gjithashtu ai akuzon qeverinë se ka dështuar në menaxhim për shkak të korrupsionit të lartë në sektor.
Postimi i Salianjit:
Qeveria vendosi që çdo kilovat energji elektrike e harxhuar mbi 800 kWh do të paguhet 4.4 herë më shumë për konsumatorët familjarë. Aktualisht, konsumatorët familjarë e paguajnë një kWh energji elektrike me çmimin 9.5 lekë pa TVSH.
Konsumatorët familjarë do të duhet të paguajnë çmim tregu, më shumë se katër fish më të shtrenjtë në një kohë kur kostoja e prodhimit të një kWh nga KESH është vetëm 1.55 lekë
-Qeveria ja u ngarkon barrën e çmimit familjarëve sikur gjithë energjia do të blihet ndërkohë që siç thotë ERE pjesa dërrmuese e energjisë elektrike është prodhuar në vend, me një kosto shumë herë më të ulët se tregu
“Kriza” po përdoret si justifikim pasi qeveria ka dështuar në menaxhim për shkak të korrupsionit të lartë në sektor!
Qeveria sillet si armike e qytetarëve, vetëm reagimi qytetar mund ta ndalë! Protesto!
