Në një bashkëbisedim me qytetarët në Facebook, Rama u pyet për të tjera edhe për rritjen e çmimeve të apartamenteve në Tiranë, duke e bërë kryeqytetin një nder më të shtrenjtit në Evropë.
Gjatë fjalës së tij, Rama nuk dha asnjë përgjigje për shtrenjtimin qirave të apartamenteve, por u ndal te 4.646 metrat katrorë ndërtim pa leje në mes të Tiranës që i kaluan shtetit, pasi gjykata rrëzoi kallëzimin e bërë nga qeveria në qershor të këtij viti. Rama tha se rasti i 4.646 metrave katrorë detyroi qeverinë që të vendosë në fuqi ligjin e fundit që konfiskon katet pa leje.
“Është dënimi me gjobë sipas ligjit i kompanisë për 4 646 metra katrorët. Është dënim me gjobë, sipas ligjit për metër katrorë. Shuma 160 plus milionë, ose 1.3 milionë dollar, gjoba është vendosur në fillim të muajit qershor. E çuam në gjykatë gjobën dhe gjykatësi rrëzoi shtetin. Gjykatës i verbuar nga paraja. Por unë nuk ngre akuza pa prova. Gjykatës i verbuar dhe i padenjë, që i thotë shtetit jo. Ndërkohë që gjobën e ka ligji. Nuk e ka inspektorati. Ky ka qenë rasti që ka derdhur kupën dhe na ka detyruar të veprojmë me vendimin e fundit të qeverisë që mos ndërhyjë asnjë gjyqtar apo prokuror i korruptuar. Inspektorati kombëtar ka kallëzuar 40 subjekte dhe 18 kryetarë bashkish, 12 drejtorë urbanistikë në bashki. Sa nga këta kanë shkuar para ligjit? Asnjë. Dosjet i ka zënë myku nëpër prokurori”, tha Rama.
