Rritja e çmimeve në treg vazhdon dhe qytetarët nuk mund t’i përballojnë më. Për këtë arsye, qytetarët e Durrësit kanë dalë sot pasdite në protestë, duke i kërkuar qeverisë të dëgjojë zërin e tyre dhe të ul çmimet për shportën bazë.
Protestuesit u mblodhën në sheshin kryesor të qytetit para bashkisë dhe kërkuan ndërhyrjen e qeverisë për t’i dhënë fund spekulimeve, siç thonë ata, ngritjes së vazhdueshme të çmimeve nga ana e tregtarëve të produkteve ushqimore dhe bukës. “Ky është krim ekonomik, nuk ka lidhje me luftën” është shprehur një qytetarë. Dy javët e fundit çmimet e bukës dhe produkteve të shportës ushqimore janë rritur nga 20-50 përqind.
Ndërsa kujtojmë se në Tiranë është paralajmëruar një protestë kombëtare për ditën e nesërme, e cila nis në orën 11:00 dhe nuk dihet se kur do të përfundojë, pasi qytetarët kanë thënë se nuk do largohen nga sheshi pa marrë zgjidhje.
