Sopranoja shqiptare me fame botërore, Ermonela Jaho ngjitet për herë të parë në skenën e Operas Kombëtare të Uashingtonit, në ShBA me interpretimin e saj në rolin kryesor, “Madame Butterfly”.
Në një intervistë për Saimir Sulaj TV, Jaho rrëfen emocionet që përjeton në çdo shfaqje, të cilat, siç shprehet, ajo i sheh gjithnjë si të jetë shfaqja e parë dhe e fundit e saj.
“Për mua, filozofia ime është kjo, hera e parë dhe hera e fundit në atë skenë si këngëtare. Për mua është po jetoj një ëndërr, që ka filluar në Shqipëri, në moshën 14-vjecare, kur vendosa të bëhesha këngëtare operistike”, u shpreh Ermonela.
Sopranoja jonë e njohur rrëfen edhe një peng të jetës.
“Çdo skenë për artistin ka atë emocionin e vet, por do të tingëllojë paksa anakronike nuk e di tani skena në Shqipëri kur këndova “Madame Butterfly”, ku u ktheva pas 7 vitesh, një shfaqje që nëna ime nuk e pa dot për arsye sepse u nda nga jeta. Ishte një lloj amaneti të kthehesha në Shqipëri e të këndoja këtë rol dhe n.q.s ekziston një botë tjetër mendoj se arrita t’ja realizoj këtë ëndërr nënës sime që dëshironte të shihte ‘Madame Butterfly’.Në opera kërkon një lloj pjekurie, qoftë vokale, moshe dhe në atë moment që nëna ime ishte gjallë dhe donte të shihte Ermonelën “Madame Butterfly” ishte herë dhe unë po bëja hapa gjigandë që ta realizoja atë ëndërr”, tha Jaho.
