Hapja e Aeroportit Kukës kërkon 4 milion euro investime shtesë
Për Ministrinë e Transporteve shitja e koncesionit të Aeroportit të Rinasit nga TIA tek kompania kineze ende nuk ka ndodhur. Drejtori i projekteve Krislen Keri thotë se nëse kjo ndodh, do të duhen edhe disa muaj procedura që Aeroporti të ndërrojë koncesinar. Krislen Keri, drejtor i projekteve dhe PPP në Ministrinë e Transportit thotë se: “Ende nuk ka asnjë njoftim zyrtar nga kompanitë, të cilat duhet së pari të vënë në dijeni për ministrinë e transporteve e më pas atë të ekonomisë si dhe autoritetet e aviacionit civil. Do të duhen rregullime proceduriale pasi shitja e një koncesioni nuk është dicka si në rastet e bizneseve të tjera”. Por Keri thotë se në vizionin që kinezët kanë paraqitur në ministri kur kanë njoftuar nisjen e negociatave janë shprehur që në Rinas mund të ketë një terminal shtesë për shërbim low cost. Kjo do të sillte direkt ulje të cmimeve, megjithëse ende asgjë nuk është zyrtare. Ndërkohë një tjetër mundësi për të patur cmime të ulta është edhe hapja e aeroportit të Kukësit. Drejtori i projekteve Krislen Keri, thotë se që kjo të ndodhë duhet së paku një periudhë kohore një vjecare si edhe investime shtesë. Që Aeroporti i Kukësit të vihet në punë duhen ndërhyrje anësore në pistë si edhe një rrugë përqark saj, investime këto që shkojnë deri në 4 milion euro.
