Pak ditë më parë Ministria e Bujqësisë deklaroi se nuk ka infektime të reja me gripin e shpendëve dhe se vatrat e hapura po shuheshin. Por jo, teksa prej disa kohësh gripi i shpendëve dukej se ishte vendosur nën kontroll, ditën e sotme është zbuluar një vatër e re në Shkodër.
Mësohet se në zonën e Dajçit, në një banesë është konfirmuar një rast me gripin, ndërsa pula është asgjësuar dhe groposur, së bashku me 70 pula të tjera që familja kishte në zotërim. Po ashtu është karantinuar zona me një distancë deri në 10 metra, për t’u dezinfektuar.
Më herët janë zbuluar raste në Durrës, Vlorë, Korçë, Dibër dhe Lushnje. Madje shumë herë janë hedhur hipoteza se mish i infektuar i pulave po qarkullon në treg, megjithëse deri më tani nuk është raportuar asnjë rast infektimi tek njerëzit.
