Si pasojë e temperaturave që shënojnë -10 gradë në veri dhe verilindje të vendit kanë nisur reshjet e dëborës.
Aksi rrugor Bulqizë-Peshkopi ka një prani të theksuar akulli në segmentet Ura e Çerenecit-Librazhd, Bulqizë-Krastë, ku lëvizet me zinxhirë, sikurse edhe në aksin Ura e Çerenecit-Ostren i Madh dhe Ostren i Vogël.
Probleme në qarkullimin rrugor shfaqen edhe në njësitë administrative të Ostrenit, Trebishtit, Martaneshit, Zerqanit dhe Fushë Bulqizës, si pasojë e borës dhe akullit. Në këto zona, trashësia e dëborës ka arritur në 40 centimetra.
Policia e Qarkullimit Rrugor nuk ka lejuar të lëvizë asnjë automjet pa zinxhirë, pasi rreziku i aksidenteve është tejet i lartë. Firmat pastruese gjithashtu kanë vijuar punën në akset Bulqizë-Peshkopi dhe Bulqizë-Tiranë, për pastrimin e rrugës dhe kriposjen e saj.
Në Peshkopi ka pasur reshje dëbore me intensitet dhe trashesia ka arritur afërsisht 15 centimetra, ndërsa në zonat malore deri në 30 cm. Rrugët nacionale Peshkopi-Bulqizë dhe Peshkopi-Kala e Dodës-Kukës kalohen me zinxhirë.
