Agjensia e Nxitjes së Investimeve ka në shqyrtim edhe tre projekte të tjera të ngjashme
Ngritja e një resorti të madh turistik në Parkun Kombëtar Divjakë Karavasta, nga politikani dhe sipërmarrësi kosovar Bexhet Pacolli, nuk është thjeshtë një dëshirë e tij. Autoritetet shqiptare e cilësojnë atë një projekt shumë të rëndësishëm dhe që po shqyrtohet prej kohësh nga ministria e ekonomisë dhe e turizmit. Genti Beqiri, drejtor i Agjensisë së Nxitjes së Investimeve, AIDA e konfirmon këtë lajm, në një intervistë për Tema Tv.
“Eshtë një projekt që po trajtohet nga ministria e linjës. Eshtë një projekt shumë i rëndësishëm nga një investitor nga më të njohurit në arenën mbarëshqiptare”, thotë Beqiri. Sipas tij do të ishte e parakohshme të diskutohej për dëmet në mjedis që mund të sjellë projekti. Drejtori i AIDA-s shton: “Normalisht do të isha shumë i kujdeshëm në të gjitha llojet e diskutimeve e trajtimeve për sa kohë projekti është në fazën e planifikimit të mënyrës më të mirë të mundshme për të investuar. Do të këshilloja të mos arrijmë në konkluzione ku është , pse është, apo cfarë mund të prekë e cfarë mund të mos prekë”.
Ndërkohë mësohet se në trajtim nga autoritetet shqiptare janë edhe tre projekte të tjera për resorte të mëdha turistike, një në Palasë, investim i sipërmarrësit të njohur Samir Mane, një tjetër në Gjirin e Lalëzit, si edhe një investimi madh nga një grup sipërmarrësish italianë në Velipojë.
Dy ditë më parë qeveria mori vendimin që për investime të mëdha turistike, trojet pronë publike do të jepen për privatët me 1 euro. Fjala është për investime mbi 50 milion euro, ku përfshihen edhe 4 projektet e mësipërme.
