Reduktohen me rreth 2 milion euro shpenzimet e importit duke ndikuar në përmirësimin e bilancit financiar
Korporata Elektroenergjitike Shqiptare (KESH) deklaroi se 22 milionë euro përllogaritet të jetë përfitimi në energji i ardhur nga reshjet e muajit janar. Sipas të dhënave të KESH, në 20 ditë niveli i ujit në liqenin e Fierzës është rritur me 12.7 metra. Kjo ka krijuar mundësinë e reduktimit të importeve nga korporatat e energjisë.
Sipas të dhënave të KESH rezerva energjetike është shtuar me rreth 422 gigavat orë krahasuar me fundvitin e 2015-ës. Niveli në hidrocentralin e Fierzës është rreth 12.7 metra më lartë se niveli më datën 31 dhjetor 2015. Nëse kjo rezervë do të konvertohej me çmimet e bursës që merret si referencë nga KESH dhe OSSHE për eksportin dhe importin e energjisë, atëherë vlera e rezervës së krijuar është mbi 22 milionë euro.
Nga të dhënat e Korporatës Energjetikë deri mesditën e djeshme niveli i liqenit të Fierzës ishte 288.60 metër me prurje rreth 350 metër kub në sekondë. Në Koman niveli i liqenit ishte 173.7 metër dhe prurjet anësore rreth 160 metër kub në sekondë. Ndërsa në hidrocentralin e Vaut të Dejës niveli ishte 74.5 metër dhe prurjet anësore 20 metër kub në sekondë.
Falë kësaj situatë shumë të mirë të reshjeve KESH ka mundësuar ndërprerjen e importeve pa kosto për Korporatën. Për pasojë është bërë e mundur që të reduktohen me rreth 2 milion euro shpenzimet e importit duke ndikuar në përmirësimin e bilancit financiar.
