Autoriteti Rrugor Shqiptar ka reaguar për situatën e krijuar në disa akse si pasojë e reshjeve të dendura të shiut.
ARRSH ka vënë në dijeni shoferët që të kenë kujdes në të gjitha akset e shenjuara si problematike për shkak të rënies të masive të gurëve apo inerteve dhe rrëshqitjes së dherave.
Me anë të një njoftimi zyrtar, ARRSH ka bërë me dije se në aksin Bajram Curri-Valbonë ka patur rënie masive gurësh dhe dherash. Po ashtu rënie materialesh ka patur edhe në segmentet Hani i Hotit-Tamarë, Mjedë-Pukë, Fushë Arrëz-Kukës.
Gjithashtu në vendin e quajtur Krajkë në Fushë-Bulqizë, një mjet është përmbysur nga era e fortë.
Në Rajonin e Jugut ARRSH ka njoftuar se për shkak të rënies së madhe të gurëve dhe inerteve janë paraqitur problematike akset Ura e Leklit-Këlcyrë dhe Berat-Çorovodë.
