INSTAT raporton rënie të çmimeve edhe për ushqimet e veshjet
Rënia e thëllë e konsumit po jep goditje të forta në ekonomi. INSTAT raportoi sot se inflacioni për muajin mars ishte vetëm 0,3 për qindm nga 2,2 për qind që ka qenë një vit më parë. Rënia e theksuar e cmimeve është pasqyrim i asaj që po ndodh me konsumin dhe gjendjen gjithnjë e më të vështirë të familjeve shqiptare. Tashmë sipas INSTAT me rënie janë edhe cmimet e ushqimeve dhe të veshjeve. Kjo spirale rënëse që ka qenë më e theksuar në tre muajt e parë të këtij viti përcjell mesazhe pesimiste për të gjithë treguesit e tjerë të ekonomisë.
Në raportimin mujor të INSTAT pavarësisht rritjeve modeste në shumë artikuj ajo që bie në sy është rënia në çmimet e qumështit, djathit e vezëve me mesatarisht 3,7 për qind, buka e drithërat me 2,2 për qind, kafe, çaj e kakao me 1,3 për qind. Ndërkohë ulja më e madhe e çmimeve vërehet në grupin Transport me 4,5 për qind, Shëndet me 2,2 për qind dhe Veshje e këpucë me 2,4 për qind.
Ngecja e çmimeve ishte edhe njëri nga shkaqet kryesore që Banka e Shqipërisë uli normën e interesit të lekut në ekonomi dy ditë më parë. Por duket se ekonomia po vuan problem më të thella pasi efektet e ndërhyrjeve të mëparshme në asnjë rast nuk janë reflektuar në çmime. Ndërkohë ekspertët e ekonomisë prej muajsh po flasin se jemi në një situatë deflacioniste, dhe se ekonomia ka problem të theksuara të ngadalësimit të rritjes.
