Rektori i Universitetit të Mjekësisë, Arben Gjata tha se protesta e studentëve shkundi shtetin, por edhe stafin akademik.
Arben Gjata: Prandaj kjo lëvizje është për t’u përshëndetur, sepse shkundi gjithë shtetin shqiptar. Këto janë probleme të mënyrës si funksionon shteti. Kjo besoj do ta bëjë më të zhdërvjellë edhe administratën e shtetit. Kjo lëvizje do t’i japë një shkundje pozitive stafit akademik për të bërë ato detyra të domosdoshme.
Gjata shpjegoi edhe qarkullimin e një lajmi se kryeministri Rama do ishte në takim me studentet e Mjekësisë.
Arben Gjata: Ne kishim një takim të planifikuar, që është në kuadër të një procesi. Ne kishim bërë dy mbledhje senati dhe pasi zbardhëm ato vendime në mbledhjen e rektoratit u kërkua që të vijnë dekanët, shefat e departamenteve dhe ishte ftuar edhe këshilli studentor. Nuk kemi pasur asnjë kërkesë zyrtare për praninë e kryeministrit. Por meqë po zhvillohen këto takime mes studentëve mund të jetë diskutuar ideja e pranisë së kryeministrit.
Gjata sqaroi edhe pikat për të cilat është diskutuar me studentët. Ai tha se në parim janë dakord për përgjysmin e tarifës, por duhet mbështetja e shtetit.
Arben Gjata: Studentët kishin paraqitur 28 kërkesa, 12 të paraqitura të cilat ne i kemi analizuar me përgjegjësi. Kemi bërë analizën financiare dhe në dy mbledhje të gjata të përbashkëta, ku merrte pjesë bordi, senati dhe dekanët kemi diskutuar me përgjegjshmëri për gjërat që mund të realizojmë. Kërkojnë një adresim të kujdesshëm duke ngritur grupe pune, me përfaqësi edhe nga studentët për të mundësuar ndryshime ligjore që janë të drejta.
Ne kemi qenë dakord që të ulen tarifat e studimit me 50%. Ne jemi në parim dakord, por për këtë duhet mbështetje nga shteti. Kemi aprovuar heqjen e tarifave të shërbimit. Ka kërkesa të tjera që lidhen infrastrukturën në mësimdhënie.
