Përfaqësuesi i FMN-së thotë se rritja ekonomike e Shqipërisë është e lartë krahasuar me mjedisin e përgjithshëm ndërkombëtar
Përfaqësuesi i FMN-së në Shqipëri, Jens Reinke, është optimist për rritjen ekonomike në Shqipëri. Ai tha sot se rritja ekonomike e Shqipërisë është e lartë krahasuar me mjedisin e përgjithshëm ndërkombëtar. Megjithatë kjo rritje nuk është aq e mjaftueshme për të ndikuar ndjeshëm tek jeta e përditshme e shqiptarëve.
Gjatë një konference për shtyp me ministrin e Financave Arben Ahmetaj, Reinke theksoi se duhet ndërmarrë disa reforma për të përmirësuar klimën e biznesit në vend.”Ne mbyllëm rishikimin e shtatë të programit. Gjatë gjithë kohës, programi ka performuar shumë mirë. Ka pasur një trajektore të mirë të administrimit fiskal. Gjithashtu, mund të them se ritmet e rritjes ekonomike janë shumë të mira duke parë mjedisin ndërkombëtar.
Lajmet për rritjen ekonomike janë inkurajuese, por natyrisht ne do të donim që rritja ekonomike të ishte më e lartë në mënyrë që të kishte një ndryshim në jetën e shqiptarëve. Prandaj, është e rëndësishme që të ketë përmirësim të vazhdueshëm të klimës së biznesit.”, tha Renike. Përfaqësuesi i FMN-së, përsëriti porosinë për qeverinë shqiptare për marrjen e masave që ndikojnë drejtpërdrejt në përmirësimin e klimës së biznesit dhe klimës së administrimit tatimor.
