“Shqipëria as ngre mure, por as do të hapë kufijtë”
Kryeministri Edi Rama ka deklaruar në një intervistë për gazetën Wall Street Journal se Shqipëria as nuk do të ngrejë mure, por as do të hapë kufijtë. “Ne kemi bërë përgatitjet tona. Kapacitetet e vendit tonë janë shumë modeste dhe nuk do të mjaftonin për të përballuar fluksin. Ne jemi të gatshëm të të jemi pjesë e një plani evropian dhe ky ka qenë pozicioni ynë edhe kur Shqipëria nuk ishte një destinacion as në teori. Shqipëria e vetme nuk mund të jetë një zgjidhje. Jemi thjesht një pjesë e zgjidhjes Europiane.Ne jemi një vend i vogël krenar dhe ne nuk do të ngremë një mur vetëm sepse na e kërkojnë të tjerët. Ne gjithashtu e dimë se hapja e kufijve nuk do ta zgjidhte problemin”, ka thënë Rama. Duke folur për një plan bashkëpunimi europian Rama ka shtuar se: “Ne kemi punuar me italianët që nga fillimi. Ne kemi një qëndrim të përbashkët: ne nuk hapim kufijtë dhe ne nuk ngremë mure. Ne thjesht duam një zgjidhje evropiane. Përsa kohë Europa sillet si një federatë egosh nacionaliste, shumë prej tyre “duan tua lënë nderin” pak vendeve. Kjo nuk do të funksionojë dhe ne nuk do të luajmë rolin e heroit sepse ne e dimë që kjo nuk do të jetë një zgjidhje”.
