Nga Mehmet Elezi
Shqip: shkaku pse nuk bëjmë zgjedhje të lira e të ndershme, nuk është modeli zgjedhor. Kryeshkaku është vjedhja e votës. Blerja e votës. Dhunimi i votës.
Zgjidhja e qëndrueshme fillon nga koka e problemit. Nga ndëshkimi i atyre që shtrembëruan vullnetin e zgjedhësve. Nga “prerja e dorës” së hajnit. Kushdo qoftë. Pastaj edhe reformë zgjedhore, po.
Reformë zgjedhore pa ndëshkim shembullor të krimit zgjedhor?
Druaj se kështu mashtrojmë veten, si plaka Cule.
Plakës Cule ia morën nipin ushtar në kulm të dimrit. Hyri në kasolle, ndezi zjarrin, nisën me iu shkri eshtërat.
–Shyqyr more bir, tha. Të paktën nisi me u ngrohë moti.
Përjashta bëhej kërdia. Fishkëllonte veriu, shungullonin ortekët.
Kallëzohet se një burri me emër i kaloi miu nëpër mustaqe, ai u pre.
–Ç’pate?, i thanë, një mi i vogël ishte, shkoi.
–Një mi, por e mësoi rrugën. Ua mëson edhe të tjerëve!
Nëpër mustaqet e zgjedhjeve në vendin tonë të dashur s’kanë kaluar minj. Kanë kaluar ujq. Kanë shqyer sa kanë dashur, pa u hyrë ferrë në këmbë.
