Opinioni Final i Komisionit të Venecias u publikua të hënën në mbrëmje
“Komisioni i Venecias është përpjekur të shmangë komentet përsëritëse nga Opinioni i Ndërmjetëm, që kishin të bënin me çështje të cilat janë eliminuar nga teksti i rishikuar. Atje ku Komisioni i Venecias ka kritika të forta për draft-amendamentet e rishikuara, ky kriticizëm është i shprehur në Opinionin Final.”
Ky është komenti që përcjell opinionin final të Komisionit të Venecias për reformën në drejtësi, I publikuar mbrëmjen e djeshme. Në këtë opinion përfundimtar bien në sy 8 ndryshime nga ai paraprak, I publikuar në shkurt. Ndryshimet e bëra janë të karakterit teknik, me përjashtim të paragrafit 8, ku ka një shtesë përmes të cilës Komisioni i Venecias e ngushton hapësirën në të cilën partitë politike mund të debatojnë duke shmangur çdo çështje nga draftet e mëparshme. Ndryshimet prekin paragrafet 8, 15, 17, 18, 19, 61, 66 dhe 69 te Draft Opinionit, ndërkohë konstatohet se është shtuar edhe një paragraf 56. Këto ndryshime në draftin final rrëzojnë disa prej 11 pikave të kundërshtuara nga opozita dhe për të cilat ajo kërkoi dialog politik.
Gjykata e Lartë Administrative edhe Këshilli i Emërimeve janë dy prej shqetësimeve të opozitës që nuk përmenden në opinion, i cili nga ana tjetër nuk jep zgjidhje përfundimtare për përbërjen e disa institucioneve të reja në sistemin e drejtësisë.
