Menjëherë pas takimit të palëve Meta-Rama, ambasadori i Shteteve të Bashkuara të Amerikës Donald Lu dhe ambasadorja e BE-së Romana Vlahutin kanë takuar kryeministrin Edi Rama. Tema e takimit është reforma në drejtësi
Ashtu si kryeministri Edi Rama edhe kryeparlamentari Ilir Meta kanë deklaruar se koha nuk pret për miratimin e saj, por drafti i Reformës në Drejtësi nuk është futur në kalendarin 3-javor të punimeve.
Po sot kreu i Kuvendit pati një takim me kryeministrin, i shoqëruar edhe nga nënkryetari i LSI-së Petrit Vasili, ministri Ylli Manjani dhe Sokol Dervishaj. Takimi ka zgjatur rreth 1 orë e gjysmë. Dje Meta takoi edhe kreun e PD-së, Lulzim Basha në hotel “Rogner”.
Basha i ka paraqitur Metës variantin për të cilin PD-ja pranon të aplikohet për emërimin e anëtarëve të institucioneve të drejtësisë. Mësohet se kreu i opozitës është shprehur që opozita ka kërkuar vetëm aplikimin e formulës së “vendeve të rezervuara” që i është propozuar nga EURALIUS dhe Komisioni i Venecias në Opinionin Përfundimtar. Mësohet se gjatë takimit Meta nuk ka shprehur një qëndrim për formulën e emërimeve në institucionet e drejtësisë, por ka marrë përsipër të luajë rolin e negociatorit me Kryeministrin Rama, që të arrihet dakordësia për reformën e shumëpritur.
