Procesi i votimit në referendumin për pavarësinë e Katalunjës ka prekur edhe futbollin.
Gerard Pique, mbrojtësi i Barcelonës e shprehu vullnetin e tij në kutitë e votimit, duke publikuar edhe foton e tij në rrjetet sociale.
“Sapo votova. Së bashku do të jemi të pathyeshëm në mbrojtje të demokracisë”, shkruan Pique.
Ish-kapiteni legjendar i Barcelonës, Carles Puyol, nëpërmjet rrjeteve sociale shkruan:“Të votosh është demokraci”.
Për referendumin në Katalunja dhe atë çfarë po ndodh në rajon foli edhe Xavi Hernandez.
“Ajo çfarë po ndodh sot në Katalunjë është një turp, është e papranueshme që në një vend demokratik të të mohohet e drejta e votës. Mbështes të gjithë personat që po kërkojnë të ushtrojnë të drejtën e tyre të votës, në formë paqësore. Rroftë Katalunja”, tha Xavi.
