Presidenti Ilir Meta, teksa ka folur në konferencën ndërkombëtare me temë “Feja si instrument i paqes”, ka përmendur rastin e vogëlushit shqiptar, Alvin Berisha, i shpëtuar pak javë më parë nga kampi i tmerrit “Al Hol” në Siri.
Në fjalën e tij, Kreu i Shtetit Shqiptar deklaroi se ai u shpëtua falë gazetarisë profesionale të huaj dhe vendase.
“Në Siri gjenden shumë gra e fëmijë shqiptarë. I gjithë opinioni u trondit nga vogëlushi Alvin Berisha. Falë gazetarisë profesioniste të huaj e vendase, ky rast u zgjidh. Duhen ngritur urgjentisht qendrat e rehabilitimit që persona të tillë të rehabilitohen. Viktima të tilla duhen përkrahur, që të bëhen pjesë e shoqërisë, pranë familjeve të tyre. Gjuha shqipe ka një fjalë të artë, që është “BESA”, fjalë unike, që vështirë të gjejë përkthim në çdo gjuhë të botës. Kjo përfaqëson frymën, shpirtin dhe karakterin e kombit tonë. Shqipëria ishte i vetmi vend në Evropë, ku në fund të Luftës së Dytë Botërore, numri i hebrenjve ishte më i madh se në nisje të luftës”, tha Meta.
