Nga Taulant Kopliku
Për motive pune, kam komunikuar këto ditë me Francesco Baranca, Sekretar i Përgjithshëm i Federbet. Për ata që s’e njohin, personi në fjalë është raportuesi në UEFA i çështjes “Skënderbeu”. Nga raporti i Federbet, UEFA ka marrë vendimin drastik ndaj skuadrës shqiptare.
Në një nga bisedat i bëra pyetje për këtë çështje dhe gjithashtu bëra krahasimin me ndeshje në dukje të dyshimta të skuadrave “big” në Europë. Pyetja ishte naive realisht, po aq naive sa ata që bëjnë të tilla krahasime. Por duhej bërë për të marrë sqarimin e nevojshëm. Fjalët e Baranca ishin këto:
“E di mirë se jam personi më i urryer në Shqipëri. Kam marrë edhe kërcënime anonime nga Shqipëria. Ju them se Skënderbeu nuk është dënuar për dyshime por për fakte të pakundërshtueshme. Dhe jo një apo dy ndeshje por më shume sesa ju mund të imagjinoni. Kur luante Skënderbeu, në Azi vendoseshin miliona dollarë baste të çuditshme që në logjikën e bastexhinjve nuk mund të shpenzohej as një dollar i vetëm. Ne jemi munduar shpesh të minimizojmë dëmet e kompanive të basteve duke sinjalizuar dhe bllokuar procesin, por si mundet të parandalohet një bast në miliona dollarë i vendosur në 10 minutat e fundit të një ndeshjeje? Është e pamundur. Dhe gjithmonë Skënderbeu, Skënderbeu, Skënderbeu. Nuk është e thënë që do të jetë medoemos e trukuar ndeshja nëse humbet Juventus pjesën e parë, ta zemë me Spal dhe e kthen rezultatin në pjesën e dytë. Ne mbajmë në vëzhgim ndeshjet dhe kur shohim se nuk ka shifra bastesh për këtë lloj rezultati, këtu nuk mban erë asgjë. Është thjeshtë koincidencë sepse nuk fitoi askush asnjë euro. Duhet ta kuptoni që askush nuk ka asgjë me skuadrat shqiptare”.
Thënë shkurt, krahasimi pse ne jo Barcelonën që humbi me Romën, është bajat dhe qesharak.
