Shqipëria renditet ndër 5- së vendet kryesore të prodhimit të kanabisit në botë sipas raportit të Zyrës së Kombeve të Bashkuara për Drogën dhe Krimin (UNODC), për vitin 2016.
Raporti, i cili ka analizuar 129 vende për një periudhë nga 2009 në 2014, tregon se Shqipëria është një nga vendet e mëdha të kultivimit të kanabisit, sëbashku me Kolumbinë, Xhamajkën, Hollandën dhe Paraguain. Sipas këtyre të dhënave, në Shqipëri në këtë vit u prodhuan 540 ton drogë dhe u zbuluan 551.414 bimë.
Sipas UNODOC, Shqipëria zë vend kryesor edhe përsa u përket fitimeve vjetore nga tregtia e paligjshme e drogave. Kjo tregti zë 2.6 % të Prodhimit të Brendshëm Bruto (PBB). Në raport thuhet se fitimi nga trafiku i drogës në Shqipëri është më i lartë se ato në vendet e zhvilluara, në raport me Prodhimin e Brendshëm Bruto. Në vendet e zhvilluara fitimet luhaten nga 0.07 – 0.19 % të PBB, ndërsa në vendet me PBB të vogël si Shqipëria (2.6 %), Irani (1.66 %) dhe Bullgaria (1.22 %), fitimet janë më të larta.
Gjithashtu, Organizata e Kombeve të Bashkuara shkruan se të ardhurat e drogës vetëm në të ashtuquajturën rrugë ballkanike kapin shifrën e 28 miliardë dollarëve në vit.
