Njerëzit e botës së krimit në vendin tonë arrijnë të kërcënojnë hapur trupat e drejtësisë. Në raportin vjetor të Këshillit të Lartë të Prokurorisë evidentohet se gjatë viti që lamë pas 8 prokurorë kanë kërkuar mbrojtje të menjëhershme nga Policia e Shtetit, pasi janë ndjerë të kërcënuar me jetë nga segmente të krimit të organizuar, për shkak të ushtrimit të detyrës. Ndërkaq, 7 prokurorë të tjerë kanë kërkuar zgjatjen e mbrojtjes, me pretendimin se rreziku ndaj tyre, familjes dhe pasurisë, ekzistonte ende, pikërisht për shkak të detyrës.
Në draftin e publikuar thuhet se Komisionit për Mbrojtjen e Prokurorëve pranë Këshillit të Lartë të Prokurorisë ka pranuar të gjitha kërkesat e prokurorëve për mbrojtje policore dhe zgjatjen e mbrojtjes. Kjo për shkak se prokurorët që kanë bërë kërkesën ndodhen në rrethana tepër serioze që rrezikojnë jetën e tyre dhe të familjarëve në çdo moment.
Sipas të dhënave të raportit numri më i lartë i kërkesave nga prokurorët që kërkojnë mbrojtje regjistrohet në Elbasan dhe Tiranë, ndërsa më pas qëndrojnë prokurorët e Durrësit, Vlorës dhe Shkodrës. “Emërimi dhe caktimi në detyrë i magjistratëve prokurorë që kanë përfunduar Shkollën e Magjistraturës, është një nga detyrimet që ka KLP-ja. Kjo procedurë është parashikuar në Ligjin për Statusin. Gjatë vitit 2021, KLP-ja nuk ka emëruar asnjë magjistrat të ri, për shkak të mungesës së studentëve në vitin e tretë të Shkollës së Magjistraturës. Nga ana tjetër, për vitin 2021 janë miratuar 7 vendime për mbarimin e statusit të Magjistratit”, thuhet në raport.
Sakaq, më tutje bëhet me dije se mbrojtja policore është vendosur, sipas rasteve, me afate kohore 3-mujore, 6-mujore dhe 1-vjeçare. Komisioni për Mbrojtjen e Prokurorëve kryesohet nga një anëtar i KLP-së, ndërsa pjesë e tij janë një përfaqësues i Ministrisë së Drejtësisë, një përfaqësues i Ministrisë së Brendshme, kryetari i Prokurorisë pranë së cilës ushtron detyrën magjistrati, për të cilin kërkohet mbrojtje, si dhe një përfaqësues të Drejtorisë së Përgjithshme të Policisë. Anëtarët e komisionit kanë mandat dyvjeçar.
