Shqipëria në mesin e vendeve të rrezikuara nga kriza e borxhit
Shqipëria, është në mesin e 108 vendeve të konsideruara si të rrezikuara nga kriza e borxheve. Në një raport për vitin 2016, ekspertët gjermanë të zhvillimit vlerësojnë se gjendja nuk ka përmirësim dhe tendenca e borxheve është në rritje. “Ne shohim prej vitesh një përkeqësim dramatik të situatës së borxheve” ka deklaruar një nga ekspertët në Berlin në paraqitjen e raportit të borxheve 2016. Sipas të dhënave të raportit borxhet shtetërore kundrejt donatorëve të jashtëm në vendet në zhvillim janë në rritje prej vitesh dhe kanë arritur në rreth 5,4 miliard dollarë. Në 25 vjet borxhet janë pesëfishuar. Sipas raportit mbi borxhet, 108 shtete konsiderohen si “me borxhe kritike”. Raste dramatike paraqiten në periferinë europiane si në Kroaci, Serbi, Ukrainë e Shqipëri. Këtyre u shtohen edhe vende të tjera nga Afrika, Azia e Lindja e Mesme. Lëvizjet aktuale të migracionit janë një “dëshmi e dështimit të politikës perëndimore të zhvillimit”. Natyrisht që borxhet nuk janë e vetmja dhe arsyeja e drejtpërdrejtë për arratinë e njerëzve, por megjithatë mungesa e perspektivës ekonomike është një faktor i rëndësishëm, thekson raporti.
Ekspertët flasin për nevojën e krijimit të një kuadri global ligjor për zgjidhjen e krizës së borxheve, në të cilin të merren parasysh edhe interesat e vendeve në borxhe, pasi sipas tyre rritja e borxhit shtetëror është një “pengesë serioze” për zhvillimin pasi nuk u le mundësinë buxheteve të shteteve për të investuar në hëndetësi, arsim e infrastrukturë.
