Grupit parlamentar të Partisë për Ardhmërinë e Kosovës, kryesuar nga kryetari Ramush Haradinaj ka zhvilluar një takim edhe me Enkelejd Alibeajn. Këtë e ka bërë të ditur Alibeaj ku shkruan se në bisedën e përfaqësuesve të dy grupeve u vlerësua bashkëpunimi miqësor mes dy parlamenteve dhe marrëdhëniet e ngushta mes grupit të PD dhe AAK.
Sipas Alibeajt, në takim u vu theksi tek nevoja e përbashkët për të ruajtur qartësisht rrugën e integrimit euroatlantik të Shqipërisë dhe Kosovës. Takimi mes tyre, nga fotot e publikuara është zhvilluar në Kuvend, në sallën e Komisionit për Politikën e Jashtme dhe jo në selinë blu. Të pranishëm janë edhe deputetë të tjerë të PD-së, si Dhurata Çupi, Kreshnik Çollaku e Ervin Salianji.
“Kënaqësi të mirëprisnim në një takim vëllazëror kolegët e grupit parlamentar të Partisë për Ardhmërinë e Kosovës, kryesuar nga kryetari Ramush Haradinaj. Në bisedën e përfaqësuesve të dy grupeve tona u vlerësua bashkëpunimi miqësor mes dy parlamenteve dhe veçanërisht marrëdhëniet e ngushta mes grupit të PD dhe AAK. Ndamë së bashku nevojën e forcimit të këtyre marrëdhënieve si dhe fokusimin e gjithë agjendës së përbashkët për të çuar në njohjen finale të pavarësisë së Kosovës nga të gjitha vendet. Gjithashtu në bisedë u vu theksi tek nevoja e përbashkët për të ruajtur qartësisht rrugën e integrimit euroatlantik të Shqipërisë dhe Kosovës” – shkruan Alibeaj.
Përpos të tjerash, ky takim i radhës tregon se pas Yuri Kim, edhe ish-kryeministri i Kosovës, Ramush Haradinaj i ka bërë ‘dalje’ ish-kryeministrit Sali Berisha, duke njohur kështu si përfaqësues së PD-së Enkelejd Alibeaj.
