Kryeministri viziton një fabrikë tullash ku theksoi se lufta ndaj informalitetit ka rritur forcën e sipërmarrjeve shqiptare
Kryeministri Rama vizitoi sot një fabrikë tullash, e kthyer në një prej sipërmarrjeve më të mëdha në Ballkan në prodhimin dhe tregëtimin e këtij produkti. Duke e konsideruar këtë fabrikë një histori suksesi që po preket në shumë sipërmarrje, kryeministri theksoi edhe njëherë angazhimin e qeverisë për formalizimin e ekonomisë dhe shmangien e konkurrencës së pandershme.
“Lufta kundër informalitetit po jep rezultate, por ka akoma shumë për të bërë. Ne po përpiqemi dhe bëjmë çmos të mos e stresojmë biznesin. Kemi ndryshuar taktikë sepse tani jemi në një fazë tjetër. Kemi një tru elektronik në Tatime, që bën gjithë mbledhjen e xhirove dhe që jep alarm kur ka devijime. Do ta zgjerojmë këtë tru elektronik edhe me partneritetin për interesin publik për mbledhjen e TVSH.
Ju përfitoni drejtpërdrejtë pasi ulet shumë konkurrenca e pandershme. Sjellja e të vegjëlve ka filluar të ndryshojë. Të mëdhenjtë nuk mund t’i përdorin më të vegjlit dhe t’i abuzojnë për të shfryrë në mënyrë të paligjshme paranë. Nga ana tjetër, përsa i përket ndërtimit, jemi në kushte të tjera dhe ky sektor çlirohet plotësisht. Njësitë e banimit në të gjithë zonën rurale, që ju i keni më problem, tani ndërtohen pa problem. Mjafton që të vazhdoni me procedurat në bashki”, ka thënë Rama në fjalën e mbajtur në fabriken e tullave.
