Pasi Partia Demokratike e akuzoi se po heshte lidhur me vrasjen misterioze të shqiptarit, Pëllumb Marnikollaj, në Greqi, Kryeministri Edi Rama është përgjigjur nëpërmjet një statusi në “facebook.”
Në postimin e tij Rama ka pohuar se qeveria jo vetëm nuk ka heshtur, po e ka ndjekur dhe po e ndjek hap pas hapi këtë çështje.
Gjithashtu, Kryeministri i vendit ka bërë ftesë që të respektohet dhimbja e familjarëve dhe të mos instrumentalizohet politikisht kjo ngjarje.
Rama: “Meqë disa komentues në këtë faqe, kanë ngritur shqetësimin pse po hesht qeveria për humbjen e jetës së një shtetasi shqiptar në një rajon policie në Athinë, sqarojmë se qeveria jo vetëm nuk ka heshtur, po e ka ndjekur dhe po e ndjek hap pas hapi këtë çështje!”
Rama ka publikuar edhe njëherë deklaratën e një dite më parë të Ministrisë së Punëve të Jashtme lidhur me çështjen, ku theksohet se janë në pritje të hetimeve paraprake dhe autopsisë mjeko-ligjore për trajtimin e mëtejshëm të rastit.
“Ja edhe deklarata e plotë që Ministria e Jashtme ka bërë në kohën e duhur për çështjen” shkruan Rama.
Ministria e Punëve të Jashtme ka ndjekur hap pas hapi nëpermjet të gjitha kanaleve zyrtare rastin tronditës të humbjes së jetës së shtetasit shqiptar P.M. në një rajon policie të Athinës.
Duke u shprehur familjareve ngushëllimet më të ndjera për këtë humbje tragjike, dëshirojmë të informojmë opinionin publik se
Ambasada e Republikës së Shqipërisë në Greqi ka kerkuar nga pala greke bashkëpunimin e menjëhershëm dhe maksimal të të gjitha organeve ligjzbatuese.
Nga kontaktet e deritanishme me autoritetet greke, bëhet e ditur se ekzistojnë pamjet filmike të ngjarjes, si dhe është urdhëruar kryerja e autopsisë mjeko-ligjore.
Ministria e Punëve të Jashtme do të vijojë të ndjek me vëmëndje të veçantë rastin dhe kërkon nga autoritetet greke kryerjen e një hetimi të plotë dhe transparent, në respekt të të drejtave të njeriut dhe standarteve ndërkombëtare.
Pala shqiptare mbetet në pritje të rezultateve paraprake të hetimit të nisur, dhe bashkëpunimit të plotë të autoriteteve greke, duke rezervuar të gjitha te drejtat për trajtimin e mëtejshëm të rastit.
Ambasada jonë në Athine do të ndjek në vijimësi këtë çështje në çdo instancë dhe do të vijojë t’i gjendet pranë të afërmve të viktimës
Deri në zbardhjen e plotë të situatës MPJ fton të respektohet dhimbja e familjareve dhe të mos instrumentalizohet politikisht kjo ngjarje.
