Gjatë një bashkëbisedimi virtual me ndjekësit në rrjetet sociale, kryeministri Edi Rama tha se ka nisur puna për rrugën e Lurës dhe të Thethit, por sipas tij, nuk ka shkop magjik, që të bëjë mrekulli.
Rama tha se edhe vetë është i pakënaqur me punët e bëra deri më tani, duke shtuar se “Na duhet të shtrëngojmë dhëmbët, të punojmë dhe çdo ditë të arrijmë nga pak”.
Gjithashtu Rama sulmoi dhe kryedemokratin Lulzim Basha, duke iu referuar premtimit të këtij të fundit se do të ulë sigurimet shoqërore dhe do të rrisë pensionet.
“Do të ulim sigurimet shoqërore dhe do të rrisim pensionet, thotë miku im i fjetur, Lulzim Basha. Pensionet financohen nga sigurimet shoqërore dhe sot Shqipëria ka ende një deficit të trashëguar, sepse paguan më shumë pensione, se sa ka. I kanë rënë shkurt, herë me Suden, herë me Vebiun, herë me Saliun, dhe a ka më shkurt se me Lulin, por nëse e kanë zgjedhur t’i bien shkurt, nuk e kanë të gjatë rrugën e Shqipërisë”, tha kryeministri.
