“Jemi plotësisht të hapur për çdo propozim nga ana juaj lidhur me formatin dhe mënyrën e funksionimit të këtij forumi”
Një ditë pas ftesës publike, Rama i ka dërguar sot një letër kryetarit të opozitës Lulzim Basha, një ftesë për takim të nivelit të lartë për të diskutuar për reformën në drejtësi.
Deputeti socialist Taulant Balla, konfirmoi sot lajmin për mediat. Ai sqaroi se fteza zyrtare e kryeministrit drejtuar kryetarit të opozitës ka për qëllim ngritjen e një tryeze mes tyre për të zgjidhur pa ndërmjetësimin e ndërkombëatreve, çështjen e Reformës në Drejtësi.
Letra
“Në këndvështrimin tonë ky forum i përbashkët nuk do të zëvendësojë apo paralizojë asnjë instancë tjetër të komunikimit institucional të përhershëm apo të përkohshëm mes koalicionit qeverisës dhe opozitës. Ky, sipas nesh do të ishte natyrisht nëse edhe ju do të keni të njëjtin vullnet si dhe ne për të diskutuar hapur sy më sy, sipas axhendave e modaliteteve të dakordësuara plotësisht, një mekanizëm më shumë në komunikimin e nevojshëm mes palëve politikë në Shqipëri.
Le të provojmë t’u japim qoftë njerëzve tanë dhe qoftë partnerëve të këtij vendi provën e një vullneti të përbashkët për ti dhënë mosdakordësisë politike mes palëve një përmasë kaq të munguar civilizimi.
Jemi plotësisht të hapur për çdo propozim nga ana juaj lidhur me formatin dhe mënyrën e funksionimit të këtij forumi. Por paraprakisht dëshirojmë të dimë nëse dhe ju dëshironi këtë përpjekje të re për komunikim mes nesh.
Ne jemi gati po ju a jeni gati?
