Kreu i qeverisë Edi Rama e konsideroi të arsyeshme kërkesën e opozitës për të shtyrë afatin e kartave të identitetin përtej 25 Prillit në mënyrë që të mos ndikojë në procesin zgjedhor.
Në përfundim të takimit me shtabin elektoral të PS, Rama deklaroi se Partia Socialiste do të dalë e vetme në zgjedhje pasi ka aleancë vetëm me qytetarët.
“Sistemi që kemi zgjedhur është sistem ku çdo parti garon me simbolin e saj dhe skuadrën e saj ose bën një koalicion me një simbol dhe skuadër të përbashkët. Ne e kemi pasur të qartë që ne koalicionin e kemi me njerëzit dhe shumicën e kemi me njerëzit dhe nuk kemi asnjë diskutim në këtë pikë.
E kuptoj edhe pyetjen tuaj duke parë se çfarë ndodh në kampin tjetër ku po punohet për një hibrid të patretshëm.Nuk e kam dëgjuar propozimin por kur bëhet fjala për zgjedhjet, ato janë të përbashkëta, rregullat e lojës janë bërë bashkarisht dhe çdo propozim i arsyeshëm është i mirëseardhur. Bën sens dhe do trajtohet me seriozitetin e duhur që palët të ndihen të barabarta.Unë nuk mendoj që ka nevojë për komente”, tha Rama.
Rama u shpreh se nuk përjashtohet mundësia e kandidimit në listat e PS të personave që vijnë nga parti të tjera, por shtoi se kjo do të mbetet në tagrin e drejtuesve politikë në qarqe. ” Drejtuesi e qarqeve po bëjnë vlerësimet dhe do të përfshijnë në listat e tyre edhe prurje të reja”, tha Rama.
