Në një bashkëbisedim me fermerët në fshatin Mashan në Gramsh, kryeministri Rama prezantoi pikat kryesore të programit të buqësisë, që në fokus ka familjen fermere, si pikën kryesore të zhvillimit të fshatit.
Kreu i qeverisë i ftoi ata të përfitojnë sa më shumë nga fondet në bujqësi.
Shqetësimeve të banorëve për mungesën e ujit të pijshëm, por edhe sa i takon infrastkturës, kryeministri iu përgjigj përmes batutave, duke kërkuar edhe pak kohë.
“Familja fermere duhet të jetë njësoj si një biznes i vogël në qytet. Një familje fermere duhet të prodhojë të ardhura. Kjo është hapja e një epoke të re, ku do të shihen frytet e një ndryshimi historik. Njerëzit në fshat të mos rrijnë të presin, por të sigurojnë pronën e tyre. Ne po hapim jo kanale vaditëse, por rrugë zhvillimi.
Më thoni të vij sa herë të doni, se vij. Por rrugë dhe investime mos më kërkoni tani, se nuk kemi ku t’i gjejmë lekët që t’i bëjmë direkt. Do t’i bëjmë me radhë. Sa fëmijë ke? 3? I bëre përnjëherë apo me radhë? Një e nga një? Epo edhe ne me radhë do t’i bëjmë gjërat”, tha Rama.
Më tej, kryeministri i bëri thirrje të rinjve në fshat të mos largohen nga Shqipëria, por të fokusohen në arsimin profesional.
