“Dëshirojmë një forum dialogu konstruktiv dhe konkret”
Përgjigje konfuze ku nuk kuptohet se cili është qëndrimi i kreut të opozitës. Kështu e ka quajtur letrën që Lulzim Basha I ktheu kryeministrit pas ftësës së tij për dialog të nivelit të lartë politik për Reformën në Drejtësi. Sipas Ramës është e paqartë nëse PD i është përgjigjur letrës pozitivisht, negativisht, apo nuk është përgjigjur fare për propozimin bërë. Ja përgjigja e Ramës: “Sot i kam nisur zyrtarisht ftesën këtu bashkëngjitur, zotit Lulëzim Basha. Sapo ka mbërritur mbi tavolinën time, përgjigja e tij, këtu bashkangjitur gjithashtu. Ju lutem më thoni nëse jam unë gabim apo ka diçka që nuk shkon fare në përgjigjen në fjalë! Sepse më ngjan që letërshkruesi është përpjekur të thotë shumë gjëra njëherësh, po si përfundim nuk merret vesh cila është në fakt përgjigja për ftesën(?!). Po? Jo? Ndoshta po ndoshta jo? As po as jo? Apo thjesht asgjë? Sidoqoftë e përsëris, ne jemi gati. Në ftesën tonë, kemi qenë shumë të qartë që nuk imponojmë asgjë (natyrisht as nuk mund të na imponohet kurrëgjë). Dëshirojmë një forum dialogu konstruktiv dhe konkret, me axhendë çështjesh të dakordësuar 100%. Do të ishte shumë mirë të ndodhte për arsyet që kemi thënë, por ndërkohë ndodh s’ndodh, ne vazhdojmë me përkushtim punët tona në çdo drejtim. Për Shqipërinë e Gjeneratës Tjetër. Njerëzit na gjykojnë të gjithëve”, shkruan kryeministri Edi Rama në reagimin e tij për letrën e kreut të opozitës Basha.
