Kryeministri i kujton opozitës qëndrimin e saj fillestar për Byronë Kombëtare të Hetimit
Siç pritej, debati për Byronë Kombëtare të Hetimit ka dominuar seancën e sotme në Parlament. Kryeministri Rama dhe ish-kryeministri Berisha kanë mbajtur për më shumë se tri orë peng, foltoren e Kuvendit duke hedhur akuza ndaj njëri-tjetrit për pengesën e miratimit të Byrosë së Hetimit.
Kryeministri Rama tha se drafti i Byrosë i miratuar nga qeveria, është ai që u dakordësua me opozitën dhe partnerët ndërkombëtarë, por sipas tij, opozita nuk i qëndron fjalës.
“Të gjithë prisnin të fliste për Byronë e Hetimit, foli për byronë politike. Pse keni gënjyer publikun shqiptar dhe keni mohuar një fakt shumë të thjeshtë, që drafti i Byrosë së Hetimit që Qeveria ka sjellë në parlament është drafti që keni dakordësuar ju 100%. Është një shpifje dhe një gënjeshtër shumë e madhe se vë në pozitë të vështirë partnerët tanë dhe mbi të gjitha krijon një konfuzion të publiku. Nuk ju kushton asgjë që ju të dilni dhe të thoni ne jemi dakordësuar më këtë draft, por tani kemi ndryshuar dhe mendojmë sic mendonte kryeministri”, tha Rama.
