Një ditë pas votimeve të 30 qershorit nënkryetari i LSI-së, Petrit Vasili është shprehur se edhe pse i vetëm kryeministri Edi Rama ka manipuluar votat.
I ftuar në rubrikën “Opinion” në studion e lajmeve në News 24, Vasili tha ndër të tjera se këto votime treguan se kryeministri është një i vdekur që ecën.
“Ka ndodhur një manipulim i trashë. Po ju jap një lajm: Në Librazhd janë shënuar zgjedhës me një numër të caktuar në procesverbal dhe vota në kuti më pak. Po ashtu vetëm në një KZAZ në Tiranë ka pasur 2 mijë vota të pavlefshme.
Vëzhgues të ndryshëm më kanë thënë se shumë qytetarë që kanë votuar, kanë dalë që aty duke qarë, duke thënë se nuk do votoja kurrë për këta, por më kanë detyruar e shatazhuar. Megjithatë sot jam i gëzuar, pasi populli e ka kuptuar se çfarë po ndodh, një degradim i tmerrshëm politik dhe moral nga ana tjetër. Sot Edi Rama është një i vdekur që ecën…ose i mbush kutitë, ose i kërcënon njerëzit”,- shtoi ai.
