Për 9 hidrocentralet e tjera Kryeministri me sa duket nuk ka vendosur t’i miratojë lejet mjedisore
Kryeministri Edi Rama tha nga foltorja e Kuvendit se në Valbonë do të ketë vetëm 2 HEC-e ndërsa, për 9 të tjera nuk është dhënë drita e gjelbër.
Më tej Rama shtoi se këto 2 hidrocentrale që do të ndërtohen nuk do të cënojnë peisazhin, do të jenë të ndërtuara sipas teknologjisë të ngjashme me atë të përdorur në Europën Veriore.
Rama: Gjashtë HEC-e në Theth janë anulluar nga ne, duke ndjekur rigorozisht procedurat, pasi nuk është hap e mbyll sytë asnjë procedurë anullimi. Po ju sqaroj që kemi mbajtur rigorozisht në vëmëndje dhe procedurën për Valbonën dhe 2 HEC vetëm dy, jo 11, të cilat kanë marrë dritën jeshile, për shkak pamundësie të plotë ligjore për të bërë anullimin janë kaluar në filtra njëri pas tjetrit për të garantuar me ekspertizë ndërkombëtare standarde mjedisore dhe cilësi projektimi inxhinierik të njëjtë me ata që vazhdojnë të ndërtohen në Europën e Veriut.
Për publikun, kur dëgjoni hidrocentrale në Valbonë lidhur me këto dy projekte, sepse nëntë të tjerave nuk u është dhënë drita jeshile, mos parafytyroni diga. Nuk do të ndërtohen diga. Nuk do ndërtohen strukturat që secili i imagjinon, kur flitet për një hidrocentral, sepse teknologjia e përdorur është krejt tjetër, dhe peisazhi është krejtësisht i pacënuar. Vetëm 2 nga 15 janë dy kulla tradicionale të asaj zone.
