Kryeministri Rama: Shqipëria nuk mund të merret si shembull për Brexit
Kryeministri i Shqipërisë, Edi Rama ka folur në një lidhje për televizionin britanik “Sky News” për përfshirjen e vendit tonë në debatin që po zhvillohet në Britaninë e Madhe mbi referendumin nëse duhet të qëndrojnë apo jo në Bashkimin Evropian.
Rama duke folur në emisionin “Sky News Tonight”, u pyet për deklaratën e sekretarit britanik për Drejtësinë, Michael Gove, tha se fillimisht i ishte dukur si shaka që Britania të merrte Shqipërinë si shembull për marrëdhënien me BE-në duke mos qenë pjesë e Unionit. Ai u shpreh se Shqipëria nuk mund të merret si shembull në këtë rast, pasi ajo kërkon që të bëhet pjesë e BE-së.
I pyetur se çfarë pëlqen nga BE-ja, Rama u përgjigj: “Duket e çuditshme që vendi i Uinston Çërçill po diskuton largimin apo qëndrimin në BE dhe po harron esencialen në këtë debat që BE u ndërtua si një projekt i madh i paqes dhe prosperitetit… dhe nëse gjërat nuk po funksionojnë, atëherë kjo do thotë se ka diçka që nuk shkon, por jo sepse BE nuk po funksionon në vetëvete apo që Unioni nuk është funksional.”
I pyetur nga gazetari — duke sqaruar se ky nuk është mendimi i tij, por që qarkullon në Britani — se nëse një ditë Shqipëria do të hynte në BE, shqiptarët do të fluturojnë për në Britani, Kryeministri shqiptar tha: “Shqiptarët kanë regjimin e lirë të vizave prej vitesh dhe mund të shkojnë lirshëm në vendet e BE-së, por jo në Britani. Mund të pyesni gjermanët, danezët, nëse qiejt e tyre janë nxirë nga shqiptarët dhe nëse po sulmohen popujt e tyre nga shqiptarët.”
