Parlamenti në seancën e ditës së nesërme do të diskutojë mbi rritjen e çmimeve dhe masat që ka marrë qeveria. Në rendin e miratuar nga Konferenca e Kryetarëve është parashikuar 3 orë debat për kërkesën e PD-së për të zhvilluar nocion për situatën aktuale të çmimeve.
Partia Demokratike i ka vlerësuar masat anti-krizë të qeverisë të pamjaftueshme. Sipas selisë blu Paketa Sociale e Qeverisë është një lëmosh dhe nuk ndihmon sa duhet shtresat më të prekura nga kriza.
Gjithashtu, njëherësh është parashikuar të zhvillohet dhe Interpelanca e kërkuar nga Komisioni i Rithemelimit për të njëjtën çështje.
Debati i opozitës do të zhvillohet megjithatë me ministrat pasi kryeministri Edi Rama nuk do të jetë prezent në seancë.
Rama do të jetë nesër në Bruksel, për të marrë pjesë në Samitin e Jashtëzakonshëm të NATO-së, që mblidhet për situatën në Ukrainë.
