Kryesia e PS mblidhet sot në ora 18:00 për të diskutuar çështje organizative të partisë dhe miraton axhendën organizative për vitin elektoral
Kryeministri Rama ka mbledhur sot në selinë e PS-së sekretarët e kësaj partie për të diskutuar axhendën e mbledhjes së sotme të kryesisë së PS-së. Burime nga PS i thanë 27.al se në mbledhjen me sekretarët ka munguar, Koço Kokëdhima, sekretar për Reformën Strukturore dhe Emigracionin.
Me sa duket Kokëdhima do të mungojë edhe në mbledhjen e kryesisë, e cila zhvillohet sot në ora 18:00. Bojkoti i Kokëdhimës lidhet me raportet e acaruara mes tij dhe kreministrit Rama, por edhe me drejtuesit e tjerë të PS-së. Ndërkohë që Kokëdhima sa vjen e afrohet më shumë me LSI-në, zëra pranë PS-së dhe LSI po flasin gjithnjë e më shumë për një largim të mundshëm të Kokëdhimës nga PS. Mungesa e sotme e Kokëdhimës në forumet e PS i konfirmon këto lajme.
Zëra pranë dy partive nuk janë aq optimist për vazhdimësinë e koalicionit PS-LSI. Pak ditë më parë, Rama tha se do të ulet së shpejti në bisedime me aleatin e tij Ilir Meta për të diskutuar në se do të ketë një koalicion parazgjedhor mes tyre për zgjedhjet e ardhshme. Ndërkohë kryetari i LSI-së Ilir Meta vazhdon të shfaqet në media me deklarata dykuptimshme, të cilat marrin po të njëjtën përgjigje nga drejtuesit e shumicës, kryesisht ministra të qeverisë Rama. Ndërkohë që pritet të ketë një vendim për të ardhmen e koalicionit, “lufta e ftohtë” mes Metës e drejtuesve të mazhorancës lë pak shpresa për vazhdimësi të këtij bashkëpunimi për zgjedhjet e pranverës së ardhshme.
Ndërkohë që Meta ka nisur procesin e zgjedhjeve brenda partisë, nga ana tjetër Rama ka nisur procesin e riorganizimit të partisë për zgjedhjet e radhës. Mbledhja e sotme e kryesisë së PS-së do të miratojë strategjinë e kësaj partie për këtë vit elektoral pa lidhje me koalicionin me LSI-në. Në këtë mbledhje pritet të diskutohet edhe raporti me LSI-në dhe çfarë ndodh në strukturat e partisë në bazë dhe cilat janë raportet e tyre me strukturat e LSI-së. Zgjedhjet në Dibër dhe mungesa e funksionimit të koalicionit PS-LSI duket se kanë përshpejtuar këtë mbledhje të kryesisë së PS-së. Është hera e dytë që mblidhte kryesia, qysh prej kohës kur u zgjidhën anëtarët e rinj të këtij forumi.
