Kryeministri Edi Rama mohoi mbrëmjen e së enjtes të jetë përfshirë në çështjen e një pagese prej 80 mijë dollarësh si donacion për fushatën elektorale të vitit 2012 të presidentit amerikan Barack Obama, e cila dyshohet të jetë ofruar për t’i krijuar atij mundësinë e realizimit të një fotoje me kreun e Shteteve të Bashkuara.
Rama përsëriti se “nuk kam marrë pjesë në asnjë eveniment dhe kam bërë një foto dhe një takim me presidentin Obama. Nuk kam asnjë lidhje me asnjë lloj pagese. Zero”, deklaroi ai.
“Kjo është një çështje e hetuar dhe gjykuar në SHBA dhe, po të kisha lidhje me të, nuk do isha një person tërësisht i papërfshirë, i papyetur dhe i pakonsideruar në asnjë aspekt nga ana e drejtësisë amerikane. S’kam asnjë problem me asnjë lloj hetimi. Dhe këtë jam gati ta them kudo”, u shpreh zoti Rama sipas të cilit, lëvizja e opozitës, “rivjen si një përpjekje për të kompensuar në sytë e publikut një çështje tjetër, e hapur, qartësisht e lidhur me një shkelje flagrante të ligjeve shqiptare dhe me dyshime të rënda për përfshirje të aktorëve të tretë përmes financimit të PD”, u shpreh Rama gjatë një interviste në emisionin “Real Story” të gazetarit Sokol Balla në televizionin “News 24”.
Kujtojmë se Partia Demokratike, ju drejtua dy ditë më parë Prokurorisë për të kërkuar hapjen e hetimeve ndaj kryeministrit, i cili sipas saj “ka konsumuar të paktën 3 vepra penale, nga veprimet e tij të kundërligjshme: Ushtrimi i ndikimit të paligjshëm ndaj personave që ushtrojnë funksione publike”, “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, dhe “Pastrimi i produkteve të veprës penale ose veprimtarisë kriminale”.
