Rama në Vlorë: Detit i ka hije vala, burrit i ka hije fjala
Që nga koha e akuzave të fushatës për Berishën “rrugë, rrugë, rrugë” kryeministri Edi Rama nuk kishte folur më për to. Por nga sot kryeministri duket se ka vendosur të kthehet në projektet rrugore. Nga Vlora ai ka shpalosur atë që e quajti si projektin strategjik të qeverisë së tij dhe që është ndërtimi i rrugës së lumit të Vlorës, që sipas Ramës në vjeshtën e këtij viti nis nga punimet, duke hapur një faqe të re për rajonin e Vlorës dhe zonave jugore. Kryeministri deklaroi: “Bëhet fjalë për një investim strategjik të rëndësishëm, që i jep përmes impaktit që sjell në gjithë zonën, impakt edhe ekonomisë sonë kombëtare. Kjo rrugë krijon parakushtin për të kaluar nga bujqësia e mbijetesës, pra nga prodhimi për të mbajtur frymën gjallë të vetë familjeve të izoluara në ato territore, në një ekonomi rurale të diversifikuar, ku nuk ka asnjë diskutim që do të krijohet një akses normal për shërbimin shëndetësor, edhe për shërbimin mësimor dhe për shërbimet e tjera”.
