Kryeministri Edi Rama ka cituar, ose me saktë ka kopjuar kryetarin e PDIU-së, Shpëtim Idrizin në qëndrimin ndaj protestës së opozitës për bllokimin e rrugëve.
Kryetari i PDIU-së, Shpëtim Idrizi ka thënë dje në Durrës se nuk është zgjidhje bllokimi i rrugëve, por zgjidhje është zhbllokimi i rrugëve të krizës.
“Ne nuk mendojmë që është zgjidhje bllokimi i rrugëve, ne mendojmë se zgjidhje është zhbllokimi i rrugëve të krizës. Kjo është ajo që ne mendojmë. Të zhbllokojmë rrugët e krizës.”- është shprehur Idrizi.
Ndërkohë kryeministri Edi Rama ka deklaruar sot nga Apollonia pothuajse të njëjtën gjë, duke përsëritur besnikërisht tezat e Idrizit.
“Është koha për ta zhbllokuar këtë rrugë, nuk është koha për të bllokuar rrugët e Shqipërisë. Nuk është koha për të bllokuar njerëzit që duan të lëvizin lirisht në rrugët e vendit, nuk është koha për të bllokuar njerëzit që kanë punë.”- deklaroi Rama.
