Deputetja e PD-së Rudia Hajdari nëpërmjet një postimi në rrjetet sociale ka reaguar ndaj deklarateve të kryeministrit Edi Rama ditën e sotme në parlament, pasi e akuzoi se jeton në hënë.
Hajdari ka nënvizuar se kryeministrit Rama ka kohë që hënë i duket e gjithë Shqipëria sepse është izoluar në anijen e tij kozmike në Surrel dhe nuk sheh e nuk dëgjon se çfarë realisht ndodh në këtë vend.
Postimi i plotë:
Z. Rama sot më akuzoi se jetoj në hënë.
Në fakt atij ka kohë që hënë i duket e gjithë Shqipëria sepse është izoluar në anijen e tij kozmike në Surrel dhe nuk sheh e nuk dëgjon se çfarë realisht ndodh në këtë vend.
Nuk e sheh varfërinë që është shtuar, nuk e dëgjon dhimbjen e familjeve të përgjysmuara nga emigrimi, nuk e shikon papunësinë e as nuk do t’ia dijë për korrupsionin dhe arrogancën që po e shkaktojnë.
Në anijen e tij kozmike prej betoni, ku ndan pasuritë e vendit me të tjerë “kozmonautë”, këto halle duket sikur i vijnë nga larg, shqiptarët i duken si alienë e ne që jetojmë mes tyre e flasim gjuhën e tyre, sikur jetojmë në hënë.
Keqardhje!
