Kryeministri Edi Rama në një intervistë për huffingtonpost.it shprehet se i hapi dyert e vendit për refugjatët afganë, pasi jo shumë vite larg ishin shqiptarët ata që kërkuan ndihmë pas shembjes së regjimit komunist.
“Gjëja më e natyrshme: të hapni dyert kur dikush tjetër kërkon ndihmë nga ana tjetër. E di që të thuash kështu mund të tingëllojë patetike për ata që mendojnë ndryshe, por për fat për shumicën dërrmuese të shqiptarëve kjo tingëllon e natyrshme.
Ne jemi i vetmi vend evropian që kishte më shumë hebrenj në fund të Luftës së Dytë Botërore sesa para luftës, sepse për shqiptarët nuk kishte asgjë që të bënte më shumë çnderim sesa të largoheshin dhe t’i linin në duart e vdekjes.
Ne jemi të diktuar nga historia jonë, kujtesa jonë dhe gjithashtu kodi ynë i parë i ligjeve, Kanuni i shqiptarëve: “Shtëpia e shqiptarit është e Zotit dhe e mikut”. Kanuni përmban një kapitull të gjatë mbi mikpritjen.
Thuhet se ai që nuk i hap derën tjetrit në kërkim të ndihmës është i mallkuar përgjithmonë dhe do të jetojë i vetëm deri në vdekje, sepse nuk do të pranohet në asnjë vend apo ngjarje publike, përveç në varrim.
Por përtej kësaj, ashtu siç kemi dhënë mikpritje në të kaluarën, kemi marrë edhe shumë – jo shumë vite më parë, kur ishim ne afganët që u shfaqëm në brigjet e Italisë.
Falë mbi të gjitha italianëve, ai makthi i së kaluarës është histori, ndërsa sot shqiptarët kontribuojnë në Itali si qytetarë plotësisht të integruar dhe vendi amë gjithashtu përfiton shumë prej saj” tha ai.
Edi Rama tregoi edhe arsyen e strehimit të afganëve në hotele në Durrës. “Pas ditëve dhe netëve të fluturimeve të anuluara, më në fund kanë mbërritur të parët.
Ato u vendosën në bregdetin e Durrësit, në ambientet e hotelit të vëna në dispozicion. Ne vendosëm t’i akomodonim në ambientet e hoteleve (siç bëmë me qytetarët tanë pas tërmetit) sepse donim që ata të merrnin frymë sa më shumë nga normaliteti dhe të mos i izolonin në kampet e refugjatëve që rrezikojnë të çnjerëzohen dhe të rrisin pakënaqësinë dhe ndarjet” tha ai.
Gjatë kësaj fundjave shkoi në 275 numri i shtetasve afganë, që po strehohen në Shqipëri, pas largimit nga Kabuli, ndërsa në total do të jenë 4 mijë ata që do të vijnë.
