Kryeministri Edi Rama ka njoftuar sot për takimin që ka zhvilluar me Presidentin e Turqisë, Rexhep Taip Erdogan, me të cilin ka diskutuar edhe për ndërtimin e aeroportit në qytetin e Vlorës.
“Drekë në Stamboll me Presidentin Erdogan për projektin e aeroportit të Vlorës, linjën ajrore shqiptare e investime të tjera strategjike”, shkruan Rama në “Facebook”.
Pas kontratës së re të firmosur me koncesionarët e aeroportit të Rinasit, u krijua mundësia e ndërtimit të aeroporteve të reja në jug të vendit. Gjirokastra dhe Saranda ishin ato që konkurronin me njëra-tjetrën se kush do të përfitonte investimin gjigant, por Rama futi në lojë fuqishëm Vlorën.
Kryeministri premtoi gjatë fushatës për zgjedhjet lokale se në Vlorë do të ndërtohet aeroporti i ri dhe mesa duket është drejt realizimit të këtij premtimi.
