Mbahet ceremonia e hapjes së aplikimeve për në Akademinë e Policisë
Në ceremoninë e hapjes së aplikimeve për në Akademinë e Policisë kanë folur kryeministri Edi Rama dhe ministri i Brendshëm, Saimir Tahiri. Kryeministri tha se Policia e Shtetit në këto 3 vite qeverisje të majtë i është nënshtruar një transformimi rrënjësor, që ka rritur profesionalitetin e saj. “Jemi duke transformuar rrënjësisht Policinë e Shtetit, e cila renditet sot e para në listën e institucioneve për nga besueshmëria”, tha kryeministri. Sipas Ramës po rritet edhe niveli mesatar i arsimimit të punonjësve të Policisë së Shtetit. “Kishim policinë më të paarsimuar të rajonit tonë, ndërsa sot numri i policëve me arsim të lartë ka shkuar në 33 për qind. Ne do ta bëjmë Policinë e Shtetit një trupë të dalluar në rajon”, tha Rama. Ndërkohë ministri i Brendshëm, Saimir Tahiri deklaroi se modernizimi i policisë ka bërë përfitues të gjithë qytetarët. Ai deklaroi: “Dua të falënderoj secili prej jush në këtë sallë për besimin që keni treguar duke konkurruar për të qenë pjesë e policisë dhe për të garantuar një shoqëri më të sigurtë. Janë mbi 5000 aplikantë, por vetëm 300 do jenë ata që do fitojnë. Kjo garë e dijeve dhe përgatitjes tuaj, ka që tani shumë përfitues, dhe ata janë qytetarët jashtë kësaj salle. Kjo pasi për t’i shërbyer shoqërisë, për bërë polic ka një konkurs. Atëherë kur aplikohej për t’u bërë polic çdo kriter ishte i mirë, duke patur mik, apo dhënë ryshfet. Por sot ju keni hedhur hapin e parë në një skuadër plot ideale, në një sfidë ku askush i vetëm nuk fiton dot”.
