Ardhja e Muxhahedinëve nuk ka asnjë rrezik për Shqipërinë, tha kryeministri, Edi Rama, në një intervistë në Vizion plus. Ai sqaroi se ky është një proces që ka ndodhur në mënyrë konstante dhe se deri tani kanë ardhur në Shqipëri rreth 1000 të tillë por nuk kanë sjellë asnjë problem. Kryeministri nuk foli për shifra të Muxhahedinëve, ndërkohë që mediat kanë raportuar se në takimin me sSekretarin Amerikan të Shtetit, John Kerry, mund të jetë folur për ardhjen në Shqipëri edhe të 2000 muxhahedinëve të tjerë.
Kryeministri Rama sqaroi edhe arsyet pse Sekretari Anmerikan i Shteti nuk e takoi kryetarin e Kuvendit Ilir Meta. Sipas kryeministrit Rama, nuk është në praktikën e një Sekretari Amerikan të Shtetit të takojë kryetarin e Kuvendit. Rama solli në vëmëndje vizitën e Hillari Clinton e cila nuk pati një takim me kryetaren e athershme të Kuvendit Jozefina Topalli. Madje ai sqaroi se as takimi me Presidentin Nishani nuk ishte parashikuar, por siç tha Rama me ironi, “Për hir të së vërtetës, nuk do të kisha dashur që presidentin tim ta shoh si shef protokolli. Ndërkohë që kur sekretari i shtetit erdhi në kryeministri ishte shefi i protokollit”, tha Rama..
