64-vjeçarja Irini Bua nga Dhërmiu i Vlorës thotë se, i janë grabitur 11 mijë metër/katrorë pronë të fituar me ligjin 7501.
Teksa në emisionin “Të Paekspozuarit” diskutohej për grabitjen e tokave në bregdetet shqiptare me anë të “kopsitjes” me ligj të dokumentave tjetërsues, një pronare tokash në Dhërmi ka akuzuar Alket Hysenin se i ka vjedhur tokën.
64-vjeçarja thotë se, prona i është vjedhur nga Parlamenti dhe akuzon drejtpërdrejtë një deputet të Partisë Socialiste.
“Më është vjedhur nga Parlamenti, nga Alket Hyseni! 11 mijë metra prona. Alket Hyseni ja ka marrë Ilia Takës, të dënuar për falsifikim dokumentash dhe Ilia Taka ja ka marrë kunatit tim me dokumenta të falsifikuara”,– deklaroi ajo.
64-vjeçarja thotë se deri në 2015 kanë patur një konflikt brenda familjes për këtë pronë, ndërsa shton se çështjen do ta dërgojë deri në Strasburg.
“Strasburgu do ma japë pronën. Nëse jo pronën, por do marr dëmshpërblimin”,– deklaron Irini.
Zonja Irini Bua, pretendon se Alket Hyseni i ka tjetërsuar 11 mijë metra tokë.
Irini Bua u shpreh: “Prona ësht vjedhur nga Alket Hyseni, 11 mijë metra. Letrat që keni ju përpara, vërtetojnë vjedhjen ose përvetësimin e pronës nga Alket Hyseni. Leje mbi pronën tonë ka dhënë Edi Rama. Alket Hyseni ka bërë marrëveshjen me kompaninë e Mirela Papulit.
Nuk mund të ketë Alket Hyseni dhe kompania Papuli pronë, dhe ne nuk kemi asnjë metër katror tokë. Tani kanë dhënë leje ndërtimi tek Papuli për ndërtimin e një fshati. I bëj thirrje kryeministrit Rama që të pezullojë këtë vendim”./TCH/
