Qytetarët e Tiranës janë grumbulluar për të tretën ditë radhazi para kryeministrisë për të protestuar për uljen e çmimeve të hidrokarbureve dhe produkteve ushqimore, duke thirrur “Rama ik”.
Ata tashmë kanë lënë sheshin përballë kryeministrisë dhe janë shpërndarë në rrugët e Tiranës duke u kërkuar drejtuesve të mjeteve të fikin makinat. Gjithashtu, janë ndalur në rrugën e Durrësit ku kordoni policor ka bllokuar hyrjen e saj. Ndërkohë që të gjitha makinat në këtë rrugë janë fikur në shenjë proteste nga drejtuesit e mjeteve.
Protesta janë zhvilluar në të gjithë vendin përgjatë ditës së sotme, ku qytetarët kanë bllokuar akset kryesore të rrugëve.
Kujtojmë që, ditën e djeshme protesta u tensionua ku mbi 20 qytetarë janë shoqëruar për bllokimin e rrugës dhe për tubim pa leje. Sipas policisë, protestuesit nuk kishin marrë leje për organizimin e protestës, ndërsa për disa minuta ata bllokuan Bulevardin “Dëshmorët e Kombit”.
