Pengesa janë edhe problemet sociale, të tregjeve dhe kreditimit
Dobësitë në administratën publike dhe korrupsioni janë pengesat themelore për reformat. Fakti është I pranuar nga vetë qeveria në dokumentin e Strategjisë Kombëtare për Zhvillim dhe integrim në pesë vitet e ardhshme deri më 2020. Drafti SKZHI 2015-2020 që është në proces konsultimi parashikon që qeveria të fokusohet në ofrimin e shërbimeve publike inovatore, rregullimin e furnizimit me energji e ujë të pijshëm, nxitjen e konkurueshmërisë, krijimin e tregut të tokës dhe ndërmarrjen e reformave strukturore. Mirëpo në dokument thuhet se qeveria përballet me një numër risqesh gjatë zbatimit të SKZHI-II dhe vonesa në realizimin e vizionit të saj për zhvillim kombëtar dhe integrim në BE. Në analizë thuhet se pjesa dërmuese e këtyre pengesave ka të bëjë me risqet sociale, të tregut, të mjedisit, shëndetit, kredisë etj. Hartuesit e dokumentit që është publikuar nga Ministria e Ekonomisë pohojnë se paraqesin një rrezik të lartë për reformat kufizime të thella të kapaciteteve përthithëse në radhët e administratës publike dhe shërbimit civil.
